Jamita Minggu Lukas 8: 26- 39

 Jamita Minggu I Dung Trinitatis, 22 Juni 2025

Ev. Lukas 8: 26- 39

Topik : "Ditaluhon Jesus Tondi na Jahat" (Yesus menakklukkan Roh Jahat)

_______________________________________________________________________________________

I) Di jolo ni turpuk on nungga dipatorang pardalanan ni Jesus mamolus tao Galilea (Tiberias). Jala disi, nungga dipatuduhon Jesus huasoNa marhite na pamenakhon habahaba dohot galumbang. Ima songon na patuduhon na marhuaso do Jesus di sandok na tinompaNa.

Laos udut tusi, taida ma muse di bagasan turpuk on, na marhuaso Jesus manaluhon tondi na hodar (Roh Jahat)!

2) Inna roha, ndang pola be pajojoronhu tu hita barita masa di turpuk on ala nungga tangkas tajaha! Alai angka siputihonta ma na ringkot taida hombar tu namasa di turpuk jamita on!

Pointer Khotbah:

i) Parjolo: taida sian turpuk on, ternyata "adong misi khusus" na disangkapi Jesus umbahen ingkon laho Ibana tu luat Gadara paluahon halak na sinonggopan ni Tondi na Hodar i".

Boi dohonon, misi khusus i ima: "patuduhon HuasoNa manaluhon tondi na hodar". Tujuanna asa unang mabiar angka siseanNa i maralohon angka partondi na hodar di hasiangan on molo pe ingkon jumpang nasida i haduan di angka pelayanan nasida.

ai somal do halak mabiar mida sibolis; ai marhagogoon do sibolis maradophon jolma. Alai marhitehite Goar ni Jesus Kristus, talu do angka sibolis i.

Laos marhite on ma diajari hita asa "marpos ni roha situtu dibagasan Goar ni Jesus".

tutu godang do angka na mambahen hita tahuton di ngolu on, alai na monang do hita disi molo Jesus tapangasahon! Pangasahon ma Jesus di sandok ngolum!

ii) Paduahon: taida sian turpuk on, ternyata Holong situtu do roha ni Jesus mida sude jolma, atik pe sai hira so mararga i idaon! 

Molo tapamanat nakkin keadaan ni halak na sinonggopan ni Tondi na Hodar i, sai hira jolma na so marlaba be ibana.

ai ndang marabit be, jala ndang olo tinggal di jabu (di parbandaan nama ibana tading). Muse, nungga dirante jala di beanghon ibana. 

Tontu, nga mabiar be halak jonok tuson. Ai tung dirante pe ibana, tong do boi tallus dibahen ala ni hagogoon ni angka tondi na hodar na songgop tu ibana i.

Alai taida  sikap ni Jesus, atik pe so mararga i di halak, alai anggo di Jesus= arga situtu do Ibana. 

Bayanghon hamu ma: Pola ingkon bongot Jesus tu luat i mamolos habahaba dohot galumbang bolon di tao Galilea holan ala ni ibana.

ai molo tapamanat di ujung ni turpuk on, mulak do muse Jesus tu Galilea dunghon di pamalum Ibana halak na kerasukan i. Jadi boi dohonon: Khusus holan tu halak na kerasukan i do Jesus ro, pola mamolus habahaba. Didok roha, ndang mungkin so diboto Ibana hian i.

Asa na naeng dohononna: Tung ise pe ho, arga do ho di Debata!

iii) Patoluhon: "Mabiar situtu do sibolis mida Jesus jala ditanda do ise Ibana"!

Didok di turpuk on: Parjolo do halak na kerasukan i marnida Jesus. Jala dung diida ibana Jesus= Pintor mangangguhi do ibana jala manungkap di joloNa.

gogo ma soarana mandok: "marhua Ho tu ahu Jesus, Anak ni Debata na sun timbul? Huelekelek ho unang ahu arsahi".

Ndang Jesus na paboahon diriNa ise, alai sibolis i sandiri do na mengaku hatimbulon ni Jesus i.

inna roha, nga ringkot marsiajar hita sian sibolis on anggo sahali on! Bayanghon hamu ma: sibolis sandiri boi mengakui hatimbulon ni Jesus, hape hita boha? Sibolis mabiar mida Jesus, hape hita boha??? Manat ma hita disi!

Dung i, disungkun Jesus ma ise goarna!

sai hira na luccu do nian on ate!! (sai hira na silaturahmi halak i,, siapa nama?? ninna hehehe...)

Gabe didok sibolis i ma: "Lokas do goarhu!" (molo di hata Indonesia didok: Legion)

(Legion= ima sada istilah na martudutudu tu pasukan tentara Romawi na marasam 3000- 6000 prajurit na tangguh)

Jadi boi dohonon, marasam 3000 - 6000 tondi na hodar ma na songgop tu halak i. Alai mabiar do sude nasida marnide Jesus na sasada i!

Dipangido nasida ma asa unang uhumanNa nasida. 

Ala tongon adong disi angka pinahan lobu (babi), gabe tusi ma angka tondi na hodar i bali. Jadi marbubur ma nasida sian rura sahat tu tao laos mate mogap.

Marnida i, gabe maporus ma angka parmahan i laos dibaritahon ma angka na masa i tu sandok luat i.

Gabe dielekelek pangisi ni luat i ma Jesus asa sumurut sian nasida, ai biahaton situtu do nasida.

iv) Paopathon: Disuru Jesus do hita gabe sitindangi di angka pambahenanNa na tu hita!

Taida di turpuk on, dung dipamalum na kerasukan i, mangelekelek do ibana asa dohot mangihuthon Jesus. Alai didok Jesus tu ibana: "muli ma ho tu jabum, pajojor ma saluhut na binahen ni Debata na tu ho!"

Jadi, laho do ibana, dibaritahonma di sandok huta i nasa na binahen ni Jesus tu ibana.

Na naeng dohononna disi: hita pe, tontu godang do angka pambahenan ni Jesus na tu hita. Tabaritahon ma i, asa lam torop halak na porsea jala taruli di basabasa ni Jesus Kristus. AMEN....!